Агенттиктин директору Э.Н. Джантаев, Корея Республикасынын Коопсуздук жана ички иштер министрлиги, «Сэмаыль Ундонг» Борборунун өкүлдөрү менен жолугушту

This post is also available in: Kyrgyz

Бүгүн Агенттиктин директору Э.Н. Джантаев, Корея Республикасынын Коопсуздук жана ички иштер министрлиги жана «Сэмаыль Ундонг» Борборунун өкүлдөрү менен «Сэмаыль Ундонг» кыймылынын Кыргызстандын аймактарында алып бара жаткан иштери жана ошондой эле эки тараптуу кызматташуудагы актуалдуу маселелер боюнча пикир алмашты.

Жолугушууда Агенттиктин директору Э.Н. Джантаев Корей элине, Корея Республикасынын Өкмөтүнө жана «Сэмаыль Ундонг» Борборуна Кыргызстандын айыл аймактарын өнүктүрүүдө кошуп келе жаткан салымы үчүн ыраазычылык билдирди.

Ошондой эле «Сэмаыль Ундонг» кыймылынын Кыргызстандагы буга чейин ишке ашкан долбоорлору жана аталган кыймылдын алкагында алдыга пландалган иштер тууралуу пикир алмашышты.

Эскерте кетсек, 2016-жылы Агенттик жана Корея Республикасынын Коопсуздук жана ички иштер министрлигинин ортосунда кызматташтык жөнүндө Меморандумга кол коюлган. Меморандумдун максаты Кыргызстандын айыл аймактарында Кореянын «Сэмаыль Ундонг» кыймылын жайылтуу менен бирге, Кыргызстандын айылдарын, өрөөндөрүн өнүктүрүү жана Кореянын «Сэмаыль Ундонг» кыймылынын негизинде аймактарды өнүктүрүүдөгү тажрыйба алмашуу болуп эсептелинет.

Меморандумдун алкагында, 2017-2021-жылдар аралыгында Чүй облусунун 4 айылы тандалып, ал айылдардагы жергиликтүү калктын жашоосун жакшыртуу максатында бир катар иштер жүргүзүлдү.

Ал эми 2022-2026-жылдарга Чүй, Ыссык-Көл жана Нарын облустарынан 4 айыл тандалып алынып, тандалган айылдардын жергиликтүү калкынын ойлорун эске алуу жана жергиликтүү калктын аракети менен биргеликте, ашар жолу менен долбоорлор ишке ашууда.

Кошумча маалымат: “Saemaul Undong” – өзүнө-өзү жардам көрсөтүү  жана кызматташуунун  негизинде айылдардын  жана жергиликтүү коомдун  жашоочулары менен бирге жашоо-шарттын  сапатын жакшыртууга мүмкүндүк берүү менен , жергиликтүү жамааттын өнүгүүсү үчүн түзүлгөн кыймыл болуп саналат.

Бул кыймыл 1970-жылы Корея Республикасында түзүлгөн. Азыркы учурда, “Saemaul Undong” 9 өлкөдө өз долбоорлорун  ийгиликтүү жүргүзүп келет  . Борбордук Азиядан  бул кыймылга  Кыргыз Республикасы катышат.