Агенттик КР Президентинин жана Министрлер Кабинетинин Төрагасынын тапшырмасы менен Жергиликтүү мамлекеттик администрация башчыларын, Шаар мэрлерин окутууну уюштурууда
Агенттик мамлекеттик жана муниципалдык кызматкерлерди окутуу, кайра окутуу, квалификацияларын жогорулатуу ишин алып барат. Ошонун негизинде Мамлекеттик башкаруу академиясынын базасында жергиликтүү администрация башчыларын, шаар мэрлерин окутуу-тренингин уюштурулууда.
Иш чаранын ачылышына, КР Президентинин Администрациясынын жана Министрлер Кабинетинин чечимдерин даярдоо башкармалыгынын начальниги Азамат Кадыралиев, Кыргыз Республикасынын Министрлер Кабинетине караштуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору Кудайберген Базарбаев, КР Президентине караштуу Мамлекеттик башкаруу академиясынын ректору Алмазбек Акматалиев, КР Президентинин Администрациясынын жана Агенттиктин кызматкерлери катышты.
Окутуу-тренинг КР Президентинин жана Министрлер Кабинетинин Төрагасынын тапшырмасы менен ишке ашырылууда. Тренинг төрт күнгө созулуп, тармактык окутууларга бөлүнүп өз ишин алып бармакчы. Бишкек шаарындагы окууга, жалпысынан Чүй, Талас, Нарын, Ысык-Көл облустарынын райондорунун акимдери, шаар мэрлери чакырылган.
Кудайберген Базарбаевдын иш чаранын ачылышындагы сүйлөгөн сөзүнөн: “Бүгүн, Кыргыз Республикасынын Президенти Садыр Нуркожевич Жапаровдун тапшырмасына ылайык коомду жана мамлекетти түп-тамырынан жаңылоо боюнча алдыбызда турган жаңы саясий, экономикалык жана социалдык милдеттер, кадр саясатында принципиалдуу жаңы ыкмаларды колдонуу талабы турат. Мамлекеттик кадрларды жаңыча калыптандырышыбыз керек. Учурдун заманбап чакырыктарына туруктуу, жөндөмдүү адистерди ишке тартып, алардын квалификациясын жогорулатып жана кайра даярдоодон өткөрүү мезгилдин талабы. Ошондой эле, Кыргыз Республикасынын Министрлер Кабинетинин Төрагасы — Акылбек Усенбекович Жапаровдун тапшырмасы боюнча 2024-жылдын 13-майынан 16-майына чейин Бишкек шаарында, 20-майдан 23-майына чейин Ош шаарында Кыргыз Республикасынын шаарларынын мэрлеринин жана райондордун акимдеринин квалификациясын жогорулатуу курстары өткөрүлүп башталды. Бул окутуу сиздердин карьераңыздардагы маанилүү этап болуп, өлкөбүздүн тез өзгөрүп жаткан экономикалык жана саясий кырдаалында татаал маселелерди чечүүгө жана адилеттүү чечимдерди кабыл алууга жөндөмдүү, натыйжалуу лидер болууга жардам берет деп ишенебиз”,-деди ал.
Курстун аягында Академия тарабынан Тест жана ЭССЕ өткөрүлүп, жыйынтыгы боюнча маалыматты Агенттик Кыргыз Республикасынын Президентинин Администрациясына жөнөтүп тиешелүү чечимдер кабыл алынат.